Fyrirgefðu, mamma.
Pabbi lánaði mér það, einhvers staðar á mörkum réttar og óréttar
þegar ég var í heimsókn
og mig vantaði lyklaborð
en svo líkaði mér það svo vel að ég tók það með mér,
pabbi sagði að þú notaðir það sjaldan eftir að þú fékkst fartölvuna þína,
líklega hefurðu áður notað það við iPadinn
en það þýðir auðvitað ekki að ég sé í rétti.
Einhvern veginn verður maður víst að vera í órétti,
því miður, langar mig að segja, en það væri næstum óheiðarlegt,
svona er þetta bara, ef það er þá svona og ég held að þannig sé það,
að einhvern veginn verði maður að vera í órétti,
annars ætti maður ekki hlutdeild í heiminum,
væri bara ímyndað laufblað
í óljósri þoku
(til aðgreiningar frá skýrri þoku).
Minnir mig á heimspekiþýðingar og tilraunir til að greina skýrt á milli orðanna skýrt og greinilegt eins og annað þýði eitt og hitt eitthvað annað, eins og þau séu sjálf skýr og greinileg en ekki hversdagsklunnalegur áhersluauki.
Ég vil taka það fram skýrt og greinilega, og gera öllum ljóst, að álögur verða ekki hækkaðar í þessu ljóði.
Allra síst álögur á þig, elsku mamma.
En ég stal samt lyklaborðinu þínu.
Og þetta ljóð er ekki tilraun til að bæta það, þú færð það ekki í staðinn, ég hef ekki sjálfdæmi í svona málum og ætla raunar enn (í raun og veru) að skila þér lyklaborðinu, helst áður en líður á löngu, helst óháð því hvort og hvenær ég lít sjálfur svo á að ég telji mig hafa efni á öðru eins lyklaborði í staðinn,
einhvern veginn þarf maður að vera í órétti en maður þarf líka að djöggla óréttinum, ef maður situr of lengi fastur í sama órétti hlýtur ekki bara heldur hefur þá þegar eitthvað staðnað, þó ekki sé nema óréttarstaðan, við djögglum, við höfum (í raun og sanni) í hyggju að djöggla, skýrt og greinilega, og skila þessu lyklaborði,
múðurlaust.
Ekki þarf frekari vitnana við.
Orðlengjum þetta ekki frekar.
Nú er mál að linni.
Þetta lyklaborð er svo gott að þú ættir að geyma það í ísskápnum og næst þegar ég kem skil ég eftir miða,
ég segi fyrirgefðu mamma,
ég ætlaði ekki að –
og byrja aftur að plata
skýrt og greinilega.